التقرير النهائي للسيات ابيزا 2014 بعد 15000 كيلو + اسعار قطع الغيار والصيانه

بسم الله الرحمن الرحيم

http://nileup.com/up/uploads/nilemotors_14236783391.jpg


تكمله لسلسله مواضيع سيات ابيزا الجديده

http://www.nilemotors.net/Nile/418944-2014.html

http://www.nilemotors.net/Nile/427021-2014-3000-a.html

حبيت انقلكم تجربتي و وجهه نظري المتواضعه للسياره بعد استخدام سنه 15000 كيلو

العربيه بوجه عام جميله وهتريح اللي يركبها


الموتور

للاسف التوكيل عشان سياسات خاصه مش بيستخدم زيت كاسترول اللي سيات بتنصح بيه
ومحستش بقيمه زيت كاسترول الا بعد م حطولي زيت توتال
الموتور بقي صوته اعلي من الاول
RPM بقي اعلي وكذلك استهلاك البنزين
بس زياده حوالي 20 %
اتمني انهم يغيروا الزيت او حتي احنا نجيبه وهما يحطوه
ـــــــــــــــــــــــــ ـــــــــــــ
الفتيس

من الاخر انا لا بجيب S ولا ستيب ترونيك معظم الوقت علي ال D
مش بجيب السبورت غير لما بكون محتاجه مش عشان اريح الفتيس
انا جايب العربيه تخدمني مش اخدمها انا
وقت ميحصل للفتيس حاجه لا قدر الله يبقي موضوع تاني
المهم
الفتيس الحمد لله مفيش اي ملاحظات وزي الفل بفضل الله
ـــــــــــــــــــــــــ ــــــــــــــ

الفرامل
ممتازه الحمد لله زي مهيا مفيش شكوي منها

ـــــــــــــــــــــــــ ــــــــــــــ
القياده والثبات والتحكم

تمام الحمد لله وجبت بيها سرعه 205 ك \س مع اتزان وثبات تمام بالنسبه لعربيه ف الكتالوج بتاعها السرعه القصوي 185
ـــــــــــــــــــــــــ ـــــــــــــــ

البنزين

علطول 92 و مش بتعامل غير مع بنزينه واحده جمب البيت .. موبيل
مره حطيت من بنزينه وطنيه ف محور المشير طنطاوي لاقيت ف رجه ف العربيه وصوت الموتور متغير
مجربتش لسه 95
ـــــــــــــــــــــــــ ــــــــــــــ
التخزين

العربيه بتشيل وحماله اسيه
حطيت فيها ترابيزه كومبيوتر وكرسي مكتب وياما عبتها شنط
محستش انها صغيره خصوصا لما تقفل الكنبيه اللي ورا
ـــــــــــــــــــــــــ ــــــــــــــــــــــ
العفشه
تمام بس كانت محتاجه تبقي انعم من كده
ــــــــــــــــــــ

نيجي بقي لموضوع الصيانه

حجزت عن طريق التليفون ولما روحت ع البوابه لاقيت الامن عند كشف بالناس اللي تخش النهارده للصيانه
اتاكد من اسمي بالكشف ودخلت
جالي مهندس الاستقبال وخلص شويه ورق واداني ايصال بانهم استلموا العربيه ( مهم جدا الايصال دا عشان لاقدر الله لو عملوا حاجه غلط ف العربيه )
وبيدني ايصال بنوعيه الكشف
و المهندس بيكتب ف الكشف لو ف اي خبطه او خدش ف العربيه او اي حاجه عشان يثبت حقك وحقه
العامل اللي اخد العربيه برده قعد يبص ف العربيه وقاللي اتاكد ان مش حاطط حاجه مهمه ف العربيه
وقفلي شنطه العربيه ب استيكر عشان محدش يفتحها او ياخد حاجه فيها

التغيير كان صيانه 15000 وتغيير زيت وفلتر وكشف ع السياره بالكومبيوتر والكشف ع تيل الفرامل

روحت الكافتيريا شربت الشاي وقمت اتفرج ع الباسات وركبتها هيا والجولف وبصيت ع الليون وفتحتهم
لاقيتهم قالولي عربيه حضرتك خلصت
خلصت شويه اجراءات ونضفوا العربيه داخليا وخارجيا وحطوا كفر للكرسي و ورق للدواسات

التكلفه 550 جنيه

المده : كل دا حصل ف ساعه واحده فقط لاغير

المعامله : قمه ف الذوق والاحترام ومعامله ممتازه ومهذبين جدا وفاهمين ف الشغل
مش هديهم الدرجه النهائيه لاني لحد دلوقتي مروحتش بمشكله
ف طالما ان رايح بتعمل صيانه تبقي عادي
انما بتبان الحقيقه عند حدوث المشكله لاقدر الله
بس عامه هما ممتازين

http://nileup.com/up/uploads/nilemotors_14236768841.jpg
http://nileup.com/up/uploads/nilemotors_14236768856.jpg
http://nileup.com/up/uploads/nilemotors_14236768857.jpg
http://nileup.com/up/uploads/nilemotors_14236768858.jpg

اسعار قطع الغيار زي م اخدتها من التوكيل .... اسعار حلوه جدا

فلتر زيت 100
فلتر هواء 150
فلتر تكييف 130
بوجيه 65
فلتر بنزين 200
تيل امامي 500
تيل خلفي 450
زجاج امامي 1500
زجاج خلفي 1200
ريشه مساحه 160
فانوس امامي 1200
فانوس خلفي ب الليد 1360

وجهه نظري انها اسعار ممتازه وخصوصا انها المفروض الماني .. بكده هيشجعني اني مروحش بره واخلص كل صيانتي عندهم

نيجي بقي لجزء الاكسسوارات بلاش تقروها

جراب ريموت ( حته بلاستكه قد صابعك ) 400 جنيه
مسند يد 2200
سنسور بارك صوت فقط 2500
مردتش اساله ع الباقي :Zb_sor1[1]:

http://nileup.com/up/uploads/nilemotors_14236768845.jpg
http://nileup.com/up/uploads/nilemotors_14236768844.jpg
http://nileup.com/up/uploads/nilemotors_14236768843.jpg
http://nileup.com/up/uploads/nilemotors_14236768842.jpg




العربيه بعد تجربه كبيره لو حد بيفكر فيها .. دوس باذن الله وانت مطمن

thank you :))

ما شاء الله تقرير رائع
جزاك الله خيرا حضرتك طمنتنا جدا خصوصا انى كنت لسه بسألك على موضوع المانيوال والسبورت مود ده فى موضوع تانى ولاقيت الاجابه هنا
بس عندى سؤال معلش واعذرنى على جهلى
هو مش المفروض الصيانات اللى حضرتك عملتها من اول ما جبت العربيه دى مجانيه لاول ١٠٠.٠٠٠ كم ؟ يعنى بتبقى تبع الضمان ؟

اقتباس:

---

المشاركة الأصلية كتبت بواسطة yoyo.yasso

ما شاء الله تقرير رائع
جزاك الله خيرا حضرتك طمنتنا جدا خصوصا انى كنت لسه بسألك على موضوع المانيوال والسبورت مود ده فى موضوع تانى ولاقيت الاجابه هنا
بس عندى سؤال معلش واعذرنى على جهلى
هو مش المفروض الصيانات اللى حضرتك عملتها من اول ما جبت العربيه دى مجانيه لاول ١٠٠.٠٠٠ كم ؟ يعنى بتبقى تبع الضمان ؟

---

هوا اولا سيات الضمان بتاعها سنتين بغض النظر عن عدد الكيلومترات
ثانيا لو ف عيب صناعه ف جزء من السياره او حاجه باظت او اي مشكله التوكيل بيغيرها مجاني
انما دي صيانه دوريه بيغير زيت وبيكشف علي العربيه
اول صيانه لحضرتك بعد 5000
ياريت ضروري تلتزمي بمواعيد الصيانه حفاظا ع السياره
وعشان متخرجيش بره الضمان
وعشان لاقدر الله حصل حاجه وخصوصا الفتيس يغيرهولك ع طول
هما عندهم سياسه انك ملتزمه معاهم بالمواعيد وهما ملتزمون معاكي ف كل حاجه تانيه

تقرير ممتاز يا MR ahmed.Elashy و ربنا يباركلك فيها و يبعدك عن شر طريقها

ربنا يباركلك فيها ويكفيك شرها ويديك خيرها وان شاء الله تكتب لنا عنها تقرير ال100 ألف

تحياتي

الف مبروك ... ربنا يباركلك فيها

متابع

الله ينور ياباشا ....انا دلوقتى جايب 10000 كيلو والعربية تمام

اقتباس:

---

المشاركة الأصلية كتبت بواسطة ehab_mansour

الف مبروك ... ربنا يباركلك فيها

---

الله يبارك فيك وشكرا لمرورك الكريم

اقتباس:

---

المشاركة الأصلية كتبت بواسطة midors

الله ينور ياباشا ....انا دلوقتى جايب 10000 كيلو والعربية تمام

---

ان شاء الله توصل ل 1000000

اقتباس:

---

المشاركة الأصلية كتبت بواسطة ehab_mansour

الف مبروك ... ربنا يباركلك فيها

---

شكرا لمرورك الكريم

اقتباس:

---

المشاركة الأصلية كتبت بواسطة syd

ربنا يباركلك فيها ويكفيك شرها ويديك خيرها وان شاء الله تكتب لنا عنها تقرير ال100 ألف

تحياتي

---

ان شاء الله وشكرا لمرورك الكريم

شكرا على التقارير المفيده والرائعه في نفس الوقت
انا عاجباني الابيزا بس خايف من الفتيس اوي ولاني هاقسط تمنها فمش هبقى حمل اي مصاريف اضافيه
عايز اعرف الفتيس حصل فيه تعديل فعلا عن الموديلات السابقه ولا لأ والضمان على الفتيس شكله ايه يعني مدى الحياه زي ماكانوا عملوا قبل كده ولا محدد بكيلومترات
وشكرا على تعبك معانا

انا مشفتش حد اشتكي من الفتيس تماما الحمد لله
واتعدل الفتيس من اخر تلات سنين
التوكيل لاقدر الله لو حصل ف الفتيس اي مشكله بيغيرهولك و فوقها بوسه
شرط محدش يلعب ف العربيه
وصيانتك كلها معاهم

اقتباس:

---

المشاركة الأصلية كتبت بواسطة ahmed.elashy

انا مشفتش حد اشتكي من الفتيس تماما الحمد لله
واتعدل الفتيس من اخر تلات سنين
التوكيل لاقدر الله لو حصل ف الفتيس اي مشكله بيغيرهولك و فوقها بوسه
شرط محدش يلعب ف العربيه
وصيانتك كلها معاهم

---

انا اتصلت بيهم قالولي ان الفتيس اتعدل كليا بس انا مش عارف الكلام ده حقيقي ولا شغل تسويق خاصة انهم عاملين الضمان سنتين فقط في حين ان الكوري والياباني من 3 الى 5 سنين
وقالوا كمان ان الايبيزا نازلة على منتصف مارس
بس مش عارف ليه فترة الضمان قليله كده دي حاجه مش تقلق ولا الضمان على الفتيس بيبقى ممتد اكتر من كده ؟؟

متقلقش من الالماني ...مش قبل عشر سنين عشان تغير حاجه ،، او حاجه تبوظ منك ،، و دا عن تجربه

- هي تقفيل اسباني - يعني الافراج الجمركي مكتوب علية منين؟؟ انا سمعت انها تقفيل صيني !!!

اقتباس:

---

المشاركة الأصلية كتبت بواسطة yehia ahmed

- هي تقفيل اسباني - يعني الافراج الجمركي مكتوب علية منين؟؟ انا سمعت انها تقفيل صيني !!!

---

:M_yes[1]::M_yes[1]:

مين اللي قالك دا انها صيني ؟
العربيه موتور وجميع الاجزاء الماني بالكامل
التقفيل اسباني

اقتباس:

---

المشاركة الأصلية كتبت بواسطة ahmed.elashy

:m_yes[1]::m_yes[1]:

مين اللي قالك دا انها صيني ؟
العربيه موتور وجميع الاجزاء الماني بالكامل
التقفيل اسباني

---

شكرا لحضرتك جدا كنت بفكر اشتريها وعمل حساب على المنتدي مخصوص عشان المشركة دي :]
بس حاجة اخيرا هما بيخلوك تشوف الافراج الجمركي لما بتستلم العربية بس للتاكيد انها اسباني

اقتباس:

---

المشاركة الأصلية كتبت بواسطة yehia ahmed

شكرا لحضرتك جدا كنت بفكر اشتريها وعمل حساب على المنتدي مخصوص عشان المشركة دي :]
بس حاجة اخيرا هما بيخلوك تشوف الافراج الجمركي لما بتستلم العربية بس للتاكيد انها اسباني

---

هما مش بيخلوك تشوفه
هما بيدهولك اساسا ويبقي معاك
عشان انت بتاخده لما تستلم العربيه
عشان ترخص بيه عربيتك وبيتحط ف الملف بتاعك ف المرور

جزاك الله خيرا، وبارك لك في سيارتك.

اقتباس:

---

المشاركة الأصلية كتبت بواسطة ahmzd

جزاك الله خيرا، وبارك لك في سيارتك.

---

مشكور اخي الفاضل

السلام عليكم

شكرا يا احمد على الموضوع بجد حاجه استفد منه كتيير
انا ناويت اشتريها و على بركة الله، و حابب اعرف رأيك الأخير دلوقتي ماشي كام كيلو و أخبارها ايه معاك

للعلم انا كنت بقارن بين الابيزا و اللانسر الشارك

ارجو الافاده

شكراً

العربيه الحمد لله تمام معايا
انا عامل دلوقتي 18000
انا كنت زيك .. كنت حجزت الشارك فعلا بس لما شفت الابيزا غيرت رايي ع طول
بس طبعا مينفعش نقارن م بينهم عشان هما فئات مختلف
لو هتقارن ع حسب السعر
الشارك مفهاش عوامل امان متهيالي ف اول فئه
الشارك اوسع من الابيزا بس قطع غيارها اغلي بكتير وصاجها ضعيف جدا ومفهاش اكصدام امامي كويس
و من جوه فقيره جدا وتابلوه قديم اوي
الثبات الاتنين ثابتين بس الابيزا تتفوق ف ثبات عند الملفات و ع سرعه
الابيزا تتفوق ف البنزين
العربيه موفره لابعد الحدود
العربيات مفهاش حلو و وحش كله اذواق
لو ف اي استفسار انا موجود

اقتباس:

---

المشاركة الأصلية كتبت بواسطة ahmed.elashy

العربيه الحمد لله تمام معايا
انا عامل دلوقتي 18000
انا كنت زيك .. كنت حجزت الشارك فعلا بس لما شفت الابيزا غيرت رايي ع طول
بس طبعا مينفعش نقارن م بينهم عشان هما فئات مختلف
لو هتقارن ع حسب السعر
الشارك مفهاش عوامل امان متهيالي ف اول فئه
الشارك اوسع من الابيزا بس قطع غيارها اغلي بكتير وصاجها ضعيف جدا ومفهاش اكصدام امامي كويس
و من جوه فقيره جدا وتابلوه قديم اوي
الثبات الاتنين ثابتين بس الابيزا تتفوق ف ثبات عند الملفات و ع سرعه
الابيزا تتفوق ف البنزين
العربيه موفره لابعد الحدود
العربيات مفهاش حلو و وحش كله اذواق
لو ف اي استفسار انا موجود

---

بجد شكرا يا احمد و انا فعلا قررت اتوكل على الله و هجيب الابيزا ااول فئه من فرع العبور لون أزرق
لو في اي حاجه لازم اخد بالي منها ياريت تعرفني قبل ما اروح

تحياتي ....

عامه هما هناك محترمين ف خاليك متطمن معاهم
بس لما تحجز حاول متخدش عربيه من المعروضين خاليك يجبلك واحده من المخزن محدش قعد يفتح ويقفل فيها
واتاكد من رقم الشاسيه ف البربيز الامامي
لو فلوسك جاهزه ممكن تاخد بعد يوم او يومين يكون دخلها الصيانه وشيك عليها
وبعد م تستلمها بيوم او يومين بيتصل بيك تيجي تاخد الافراج الجمركي عشان ترخص
ابقي بص ع العربيه كويس ان مفهاش خدوش
الكشافات تكون شغاله - الكاسيت- متنساش تاخد منهم الولاعه والطفايه و اللوك بتاع الكاوتشات -وشبكه النطه والكتالوج والضمان
بالتوفيق

السلام عليكم و رحمة الله و بركاته
اخي الكريم
أولا احب اشكرك على موضوعك المميز
و يسعدني الانضمام اليكم بشراء سيات إبيزا 2015
انا معايا رينو فلوينس و مريحاني الحمد الله
الإبيزا جايبها لابني بعد إصرار منه و اعجابه الشديد بيها
انا لسه مستلمها من 3 أيام من التوكيل في العبور و ناوي ارخص بكرة إن شاء الله
أتمنى انك تقولي لو في أي نصائح ممكن تفيدني بيها في التعامل مع العربية و خصوصا الفتيس عشان اقولها لابني للحفاظ على العربية أطول فترة ممكنة بدون مشاكل ان شاء الله
اشكرك مقدما

العربيه ان شاء هتريحه وهخوفرله بنزين جامد
الفتيس جوه البلد يخاليه ع السبورت مود
مع اني مش ملتزم بالموضوع ده
بس اهم نصيحه بجد انه يخاللي باله لان العربيه جرايه اوي ةبتغري اي خد انه يجري بيها
يخاليه صيانته ع طول ف التوكيل
الحمد لله العربيه معدي بيها عشرين الف كيلو بدون مشاكل
اي استفسار انا ف الخدمه

الف مبروك ... ربنا يباركلك فيها

أستهلاك البنزين الحالي معاك عامل كام في المتوسط؟ علي الطريق السريع من غير جري و شد و من غير تكييف و بالتكييف
شكرا لذوقك

الاستهلاك ف الشتا
التفويله بتكفي ل 800 كيلو
ف الصيف بالتكييف بتعمل 700 او 750

ربنا يباركلك في عربيتك و علي ذوقك في الرد
انا والله محتار بينها و بين لوجان و بيجو 301 و عارف ان دي مش مقارنة كويسة بس انا يهمني قوي استهلاك البنزين عشان مشوار الشغل بتاعي كيبر و في نفس الوقت كنت عايز عربية عائلية شوية :E_braces[1]:

بالمناسبة , هي العربية فيهاusb ولا لأ؟

البيجو ميزتها انها واسعه شويه
بس الابيزا موتور الماني .. وجوده اعلي بكتير
بس خاليك ف البيجو احسن هيا عربيه كويسه
بس لو عليا اجيب التوليدو

لا مفهاش

التوليدو تقريبا مش موجودة, سألت كذا مرة و خلصت للاسف
البيجو عجبانى بس خايف من استهلاك البنزين مش اكتر
ربنا يقدم اللي فيه الخير و شكرا جدا علي معلوماتك و ردك

اقتباس:

---

المشاركة الأصلية كتبت بواسطة tooooma

التوليدو تقريبا مش موجودة, سألت كذا مرة و خلصت للاسف
البيجو عجبانى بس خايف من استهلاك البنزين مش اكتر
ربنا يقدم اللي فيه الخير و شكرا جدا علي معلوماتك و ردك

---

موجوده في اباظه التجمع الخامس الهاي لاين فاميه

فيه عرض علي الابيزا اسال عليه

السلام عليكم ربنا يباركلك فى العربيه يارب وكل سنه وانت طيب ومعلش هتقل عليك لو تقولى رايك فى العربيه وماشى كام كيلو حاليا واخبار الفتيس ايه وافضل طريقه للتعامل معاه لان حضرتك عارف سمعته وهل فيه حد اشتكى منه فى موديلات 2013 لحد دلوقتى ولا ايه ؟